Acisa Ribadeo fixe entrega durante toda a campaña de Nadal das rifas para participar no sorteo de 5.000 euros en vales de compra, que se celebrará na VIII Festa do Comercio o 12 de xaneiro. A campaña de Nadal daba comezo o pasado 1 de decembro e todas aquelas persoas que fixeron as súas compras no comercio local ata o día 12 deste mes obtiveron rifas para poder participar nese importante sorteo.
Os premios da VIII Festa do Comercio contarán dun primeiro premio de 2.000 euros en vales de compra, un segundo premio de 1.000 euros, un terceiro de 500 euros e dous cuartos de 250 euros cada un. Ademais haberá un premio non presencial, que é moi importante e que estará dotado de 1.000 euros en vales de compra.
Para participar nese sorteo hai que coller a parte máis estreita das rifas, que aparece perfectamente identificada, e metela na urna que haberá na carpa instalada ese 12 de xaneiro, en horario de 16:00 a 20:30 horas, no parque de San Francisco. No caso do premio non presencial o número elixido darase a coñecer o mesmo día do sorteo, e será seleccionado mediante un programa informático que escollerá de forma aleatoria un número entre os 200.000 que se están a repartir durante esta campaña. O gañador terá ata o 18 de xaneiro para presentarse nas oficinas de Acisa Ribadeo e reclamar o seu premio, “de non facelo perderá o dereito sobre o mesmo e considerarase deserto”, explican desde a Asociación de Comerciantes.
