Skip to main content
ActualidadeFoz

A basílica de San Martiño de Foz recibiu preto de 27.000 visitantes o pasado ano

Por 8 Xaneiro, 2019Sin comentarios

A basílica de San Martiño de Mondoñedo, en Foz, recibiu 26.993 visitas durante o ano 2018, 1.500 máis que en 2017. O alcalde focego, Javier Jorge Castiñeira, subliña que se seguen batendo récords.
“Desde o Concello de Foz volvemos estar moi satisfeitos cos datos que nos reporta San Martiño de Mondoñedo, concretamente as cifras das visitas do ano 2018, que foron exactamente 26.993 persoas as que visitaron San Martiño, 1.500 máis que no 2017”, anunciou hoxe o rexedor, que salienta que “séguense batendo récords e eu creo que son moitas as cousas que levan a ter estes datos. Ademais de ter un servizo de guía e de atención diaria en San Martiño, son moitos os eventos e as circunstancias que están a mellorar os datos ano tras ano”.
O alcalde sinala que “como dato exemplar o día que máis visitantes houbo foi a 16 de agosto, con 597 visitantes. Coincide tamén que agosto é o mes de máis visitas, con 8.604”.
Javier Castiñeira explica ademais que “o perfil dos visitantes é moi variado, de máis de 37 nacionalidades diferentes, incluso xente de Australia, de Nueva Zelanda, de Túnez. Para moita xente que ven á Mariña unha visita obrigada é San Martiño de Mondoñedo”.
O rexedor focense destaca que “o inicio da actividade do centro de interpretación de San Martiño, que ten unha aceptación moi boa, axuda a que a satisfacción na visita sexa moitísimo maior. A verdade que é un complemento perfecto ter un centro de interpretación que explique a historia tan importante de San Martiño. Tamén a realización de eventos diferentes, entre eles as charlas e os talleres impartidos por xente importante e por historiadores como Manuel Castiñeiras ou restauradores como Blanca Besteiro. E os eventos culturais que hai arredor de San Martiño, como pode ser o encontro internacional de corais que se fai en xuño, e tamén o Festival Bal y Gay que se celebra en agosto, fan que San Martiño sexa un complemento perfecto para moitas actividades e que ademais a xente aproveite para facer esas visitas”.
Castiñeira fai fincapé en que “estamos de enhoraboa porque seguimos incrementando as visitas a San Martiño cun novo récord, pois case 27.000 persoas nos visitaron o ano pasado. O obxectivo é seguir promocionando San Martiño e darlle a enhoraboa a todos aqueles que o fan posible, especialmente a Silvia Blach, que é a responsable do centro de interpretación de San Martiño e quen verdadeiramente ten os méritos de que ese servizo sexa moi ben valorado polos turistas. Así que estamos contentos e satisfeitos xa que San Martiño segue dándonos grandes éxitos nas visitas turísticas de Foz”.