O Concello de Mondoñedo deu a coñecer a raíña e as damas do Entroido mindoniense, que se celebrará o sábado 9 de marzo. A raíña é Sara Fernández Coldeira, e as dúas damas son Ainara Bello García e Yaiza Fernández Nogueira.
O desfile celebrarase a partir das 17:30 horas e sairá do Campo dos Paxariños, encabezado pola carroza da raíñas do Entroido, e percorrerá a avenida San Lucas e as rúas Obispo Sarmiento, Andrés Baamonde e Progreso para finalizar na praza da Catedral.
Durante o tradicional desfile de Entroido, organizado polo Concello e a Asociación de Comerciantes e Industriais de Mondoñedo (ACIAM) repartiranse 5.000 euros en premios; con seis galardoados na categoría de comparsas e charangas e once premiados na de grupos tanto de adultos como infantís; ademais haberá seis galardóns para as parellas de adultos e infantís e outros seis en individuais.
Os interesados teñen de prazo ata o venres para anotarse tanto a través do correo electrónico entroidomindoniense@gmail.com como no portelo da Casa do Concello (primeiro andar). Pódese obter máis información a través do teléfono 619 879 499. As bases están na páxina web do Concello.
