O concello de Burela organiza actividades para celebrar o Día Internacional para a Eliminación da Discriminación Racial

A Concellería de Inmigración e Cooperación organizou para as xornadas de onte e hoxe varias actividades para conmemorar o Día Internacional para a Eliminación da Discriminación Racial.

O programa deu comezo coas xornadas de difusión da cultura caboverdiana que se desenvolveron no Ceip Virxe do Carme, en colaboración co grupo Batuko Tabanka. O obxectivo foi sensibilizar ao alumnado sobre a diversidade cultural e a realidade do fenómeno migratorio dun xeito lúdico a través da música.

Ademais o alumnado de 3º de primaria dos CEIPS Vista Alegre e Virxe do Carme participa na actividade denominada Ocainmigrante, coa colaboración da aula de Medio Ambiente Gaia. A finalidade é sensibilizar aos máis novos sobre esta temática e ensinarlles a ver o mundo dende outra perspectiva, así como facelos conscientes das necesidades existentes. Mediante distintas probas, realizadas na hora de recreo, van coñecendo aspectos como o racismo, inseguridade e desamparo, acollida, pobreza, tolerancia, respecto, guerras, marxinación, rexeitamento, integración e inxustiza, entre outros.

A concelleira de Inmigración e Cooperación, Angélica Gómez, sinala que “ao longo destas xornadas hai un libro de sinaturas, na entrada da Casa do Concello, no que se pode deixar escrito algo ilustrativo sobre o tema”.

A edil burelesa lembrou que “o Concello de Burela ten convocado o VI Concurso de Lemas e Debuxo e Pintura polo Día Internacional para a eliminación da discriminación racial co obxectivo de transmitir, a través de mensaxes curtas ou debuxos, a importancia da educación en igualdade e a necesidade de eliminar a discriminación racial, así como a súa prevención. As bases para poder participar nestes concursos pódense obter na Casa do Concello o una sede electrónica da páxina web do Concello de Burela”.

Etiquetas