Burela clausurou as Escolas Deportivas Municipais de Inverno

Concello de Burela clausurou esta semana as Escolas Deportivas Municipais de Inverno. O edil de Deportes, Ramiro Fernández Rey, dixo estar moi contento pola súa evolución e polo número de rapaces e rapazas que participaron nesta edición. Os asistentes recibiron un diploma acreditativo e unha medalla. O curso rematou cunha exhibición de zumba e patinaxe.

Fernández Rey comentou que “desde o Concello de Burela na Delegación de Deportes, onte clausuramos as Escolas Deportivas Municipais de Inverno. Aproveitamos para mostrar todo o traballo que levan feito durante o ano as rapazas de patinaxe e de zumba”.

O concelleiro burelés dixo: “estamos moi contentos de cómo foi evolucionando todo e do número de participantes nas actividades. Queremos felicitar ás monitoras e á empresa que ten subcontratado este servizo”.

O edil de Deportes animou “á xente a seguir participando nelas porque evidentemente sen a participación dos nenos e das nenas non sería posible facer estas actividades. Onte a exhibición de patinaxe e de zumba foi moi vistosa e tanto os pais como as nais e avós e avoas que asistiron quedaron moi contentos. Entregámoslles un diploma acreditativo da realización da actividade máis unha medalla polo esforzo feito durante o ano”.

Ramiro Fernández manifestou que “imos seguir apostando por este tipo de actividades porque, como ben dicimos sempre, o deporte é unha das liñas básicas do noso goberno”.

Etiquetas