O escritor Jordi Sierra i Fabra, único candidato español ao Premio Andersen 2020, visitará o teatro Pastor Díaz de Viveiro o mércores 30 para reunirse con alumnos de Primaria e Secundaria. En total, serán máis de 300 estudantes os que terán a oportunidade de coñecer ao autor e formularlle preguntas.
Sierra i Fabra, autor de obras xuvenís coma ‘O asasinato da profesores de Lingua’, publicou máis de 500 libros e é un dos escritores máis lidos desde os anos oitenta nas escolas estatais e de América Latina. A súa obra traduciuse a máis de 40 idiomas e ten recibido importantes recoñecementos como o Premio Nacional de Literatura Infantil e Xuvenil ou a Medalla de Ouro das Belas Artes.
O mércores compartirá a súa experiencia e métodos con estudantes de varios centros educativos de Viveiro que poderán formularlle as súas inquedanzas. O encontro celebrarase nunha dobre sesión, ás 10.30 horas cos alumnos de Primaria e ás 12 horas cos de Secundaria.
O acto está tamén aberto ao público en xeral ata completar o aforo. Quen queira asistir debe inscribirse antes en aporral@gmail.com.
Jordi Sierra i Fabra naceu en Barcelona en 1947. É fillo único dunha familia humilde e topou con moitos obstáculos que frearon o seu soño de convertirse en escritor. O seu vínculo coa música rock, xa que foi director e fundador das principais revistas do xénero dos 60 e dos 70, servíulle para facerse popular. Publicou o seu primeiro libro en 1972 e dende entón son xa máis de 500 obras, algunhas best sellers. Ten gañado 40 premios literarios e foi traducido a máis de 30 linguas. Ten sido ademais tres veces por España candidato ao Nobel de Literatura xuvenil, o premio Hans Christian Andersen, e outras tres ao Astrid Lingren. En 2007 recibiu o Premio Nacional de Literatura do Ministerio de Cultura, en 2012, o Premio Cervantes Chico e en 2013 o Premio Iberoamericano. En 2018 alzouse coa Medalla de Ouro de Belas Artes do Ministerio de Cultura e a Creu de Sant Jordi que outorga a Generalitat. As ventas dos seus libros superan os doce millóns de exemplares.
