“O Concello de Mondoñedo ven de rexeitar no pasado exercicio de 2019 unha subvención da Xunta de Galicia para Rehabilitar as antigas vivendas de mestres, doutros oficios e demais edificios de vivendas de titularidade municipal por un importe de 25.826,01 euros, concedida pola Dirección Xeral do IGVS”, din dende En Marea Mondoñedo.
O edificio está a destinarse como centro de reunións comunitario ademais de servir para impartir cursos de actividades culturais e deportivas nó que participan activamente numerosas persoas da parroquia. “O estado non é o máis axeitado dende o punto de vista de salubridade nin de decoro, polo que a rehabilitación dó mesmo supón un importante valor engadido para as actividades comunitarias”, din.
“No pasado período electoral, o Partido Popular prometeu o arranxo destas instalacións, e así fixo a solicitude da subvención , pero posteriormente rexeitouna sen ningunha explicación a veciñanza. Este feito só pode entenderse dentro de unha política de fraude , de promesas incumpridas e de desprezo absoluto cara a cidadanía. O único interese que ten a Xunta de Goberno, tal e como leva demostrando reiteradamente é facer unha política de falsa publicidade , cara a galería, que despois non é capaz de reflectir en feitos”.
Dende En Marea Mondoñedo, queren lembrar que os veciños da parroquia están esperando dende o 3 de xullo de 2018 , que o Concello leve a cabo a promesa da Declaración Institucional desa data na que prometían a “nó que atinxe a camiños públicos continuar con axilidade e contundencia os expedientes iniciados para a reparación dos mesmos”, engaden dende o grupo político.
Así, esixen que “o Partido Popular traballe por Mondoñedo, e cumpra as súas promesas de interesarse polo benestar dos seus veciños e que deixe de enganar e mentir reiteradamente. Os programas de goberno están para ser cumpridos, e non para ser utilizados en datas electorais só para gañar votos”, rematan dicindo.
