Gonzalo Caballero desprazouse novamente ata a provincia de Lugo para seguir mantendo encontros coa militancia socialista. Así, estivo cos compañeiros e compañeiras de Guitiriz e Vilalba.
Coa vista posta nas primarias do PSdeG, que terán lugar o vindeiro día 30, Gonzalo Caballero asegurou que “este é un proxecto gañador para a Galicia poscovid” e que está impulsado “coa forza da militancia que quere seguir avanzando e non retroceder”.
Nese senso, o dirixente socialista avanzou que os novos equipos de dirección combinarán “renovación e integración” para ofrecer a Galicia “a mellor alternativa” de goberno e para “volver enfrontar con éxito as locais e xerais do 2023”.
Son, como recordou Gonzalo Caballero, os vindeiros retos electorais que ten por diante o PSdeG, polo que defendeu “un partido forte” que poida volver obter “resultados históricos” como os de 2019.
