Desde a Asociación a Ribeira de Foz volven potenciar o deporte náutico na comarca facendo canteira entre os máis novos e traballando en desestacionalizar a actividade turística local, exportando a nivel nacional e internacional o potencial da pesca deportiva responsable na Mariña de Lugo. Para iso, poñen en marcha a quinta edición das Xornadas de Pesca con Señuelos programada para o vindeiro sábado 20 de abril en Foz.
O programa comeza ás 11.00 horas na Casa da Cultura coas charlas técnicas que serán impartidas por pescadores deportivos de gran fama. Tratarase a fondo especies como o Dentón e a Robaliza e a técnica do “Micro Jjigging”, unha modalidade en auxe entre os amantes da pesca en vertical con reclamos artificiais moi pequeniños.
Tamén se falará da evolución e experiencia tras 15 anos da súa aparición dos “Vinilos”, reclamos de pesca que se asemellan aos peixes ou outros organismos acuáticos e están feitos dun material de goma suave e flexible que lles permite moverse de maneira natural na auga. Estas xornadas manteñen un éxito continuado co paso dos anos e chegan xa á súa quinta edición.
Máis de 120 afeccionados
O vindeiro sábado, volverán ter un gran número de participantes, xa que contan con máis de 120 afeccionados anotados á única parte do programa para a cal é necesaria unha inscrición, a xa clásica comida de irmandade que sempre facemos e que permite aos afeccionados á pesca deportiva, que chegarán ese día a Foz desde moitos e diversos puntos de España (País Vasco, Cantabria, Asturias, Andalucía ou Cataluña) para establecer lazos de amizade e intercambiar os seus coñecementos.
O obxectivo do evento como sempre non é o de pescar, senón o de coñecer a outros pescadores e aprender uns dos outros. Para a realización deste evento, unha vez máis contan coa axuda Michel, xerente da tenda “Kukadas” en Foz e coa colaboración do Concello de Foz, a Asociación de Comerciantes, e a distribuidora “O peixe Rosa”.
