A comisión organizadora das festas patronais de Ribadeo agradece o traballo realizado polo persoal de limpeza e obras do Concello e pola Policía Local.
Desde a comisión sinalan que “unha vez rematadas as festas deste ano dende a comisión queremos dar as grazas a todo o persoal de limpeza e obras do Concello de Ribadeo polo seu traballo, pola rapidez con que quedou todo como se non tivese pasado nada. E do mesmo xeito, agradecer tamén á Policía Local a súa colaboración e dispoñibilidade en todo momento e a calquera hora”.
A asociación agradece tamén “a cesión dos terreos que están a carón do aparcadoiro municipal, onde se instalaron as vivendas móbiles dos propietarios das barracas que acudiron ás festas de Ribadeo. E tamén a colaboración de Jacobo, da Cruz Vermella, que se encargou de saír á ría o 7 de setembro pola noite, para evitar que durante a sesión de fogos artificiais houbese embarcacións que se achegasen ao porto comercial desde onde se lanzaba toda a pirotecnia”.
A comisión tamén pide desculpas polas molestias ocasionadas á veciñanza e aos negocios situados nas inmediacións do recinto feiral: “e, dende logo, queremos pedir desculpas a eses veciños e veciñas de Ribadeo que viven na zona onde se celebran as festas patronais, xa que sabemos que non debe ser fácil durmir esa semana. E tamén aos propietarios de negocios que ven interrumpida a súa actividade diaria, con motivo das modificacións realizadas no tráfico rodado. A todos eles grazas e desculpas polas molestias ocasionadas”.
