Axencia de colocación

En marcha unha campaña en defensa dos autónomos de Ribadeo

Acisa Ribadeo pon en marcha unha campaña en defensa dos autónomos. Solicita a suspensión das cotas durante tres meses e das obrigacións tributarias do primeiro trimestre. O colectivo pide ademais a exoneración de todas as taxas municipais. A campaña denomínase #PorNuestrosNegocios.

O presidente de Acisa, Francisco Iriarte, explica na carta dirixida ás súas asociadas e asociados que “a actual situación que vivimos fainos pensar que, como colectivo que vos representa, temos a obrigación de facelo. Somos conscientes de que as medidas que se están tomando, de confinamento, de cancelación da actividade económica, etc…, son necesarias para frear esta emerxencia sanitaria que está a causar tantos falecementos e que colapsa hospitais, pero tamén, cremos que estamos no noso dereito de pedir que iso non supoña a morte dos autónomos, dos comercios, dos establecementos hostaleiros e dos servizos”.

A campaña #PorNuestrosNegocios consiste en encher as webs e as redes sociais tanto empresariais como particulares das socias e os socios de Acisa coas seguintes frases: #AyudasReales, #EnCuarentenaImpuestosCero, #EnCuarentenaCuotaCero, “para achegar o noso gran de area defendendo os nosos negocios nesta terrible situación”.

Desde Acisa animan a incluír tamén as seguintes mensaxes:
CERO INGRESOS = COTA CERO
CERO INGRESOS = IMPOSTOS CERO
PROBLEMAS CONCRETOS = MEDIDAS CONCRETAS
CERO ACTIVIDADES = CERO TAXAS

A Asociación de Comerciantes, Industriais, Servizos e Autónomos de Ribadeo reclama “a suspensión das cotas de autónomos polo menos dos meses de marzo, abril e maio, así como as obrigacións tributarias do primeiro trimestre e a necesidade de axudas reais e directas, ademais da exoneración de todas as taxas municipais”.

Iriarte Quintana subliña que “tamén solicitamos a constitución dunha mesa de traballo entre o concello e Acisa para coordinar unha nova estratexia de dinamización económica e demandamos que é esencial que se axilicen os pagos pendentes a provedores e á nosa asociación por parte das administracións”.

A campaña inclúe tamén unha carta aberta de Acisa, dirixida a toda a clase política: “ao goberno do Estado, á Xunta de Galicia e ao Concello de Ribadeo”.

Etiquetas