A área de Cultura da Deputación de Lugo levará a estrea do filme María Solinha, dirixida por Ignacio Vilar, a 12 concellos da provincia.
“Queremos axudar aos creadores galegos a chegar ao máximo público posíbel, pois na distribución enfróntanse a dous grandes retos: as dificultades para entrar nos circuítos comerciais e a falta de cines na maior parte dos concellos de Lugo. Con esta iniciativa apostamos pola cultura máis alá das cidades levando a estrea aos pequenos concellos da provincia” explicou a vicepresidenta e responsábel da área de Cultura, Maite Ferreiro.
Xa están confirmadas 10 datas para as proxeccións, que se farán ao aire libre, en espazos exteriores con asentos ubicados para asegurar a distancia interpersoal requerida para a protección da saúde colectiva.
Na Mariña, o día 3 de agosto terá lugar unha premier coa participación do director, Ignacio Vilar, e as actrices Grial Montes e Laura Míguez. Tamén se proxectará en Xove pero a data está aínda sen determinar.
