Skip to main content
ActualidadeSecciones TerraCháXAViveiroZonas AMARIÑAXAZonas LUGOXA

Viveiro acolle a campaña itinerante de concienciación do turismo seguro

Por 11 Agosto, 2020Sin comentarios

No marco do programa Galicia destino seguro, Viveiro foi a vila escollida como unha das paradas da nova campaña itinerante de concienciación para promover un turismo seguro. Así, durante a xornada de mañá situarase un espazo informativo móbil nos xardíns Noriega Varela, desde onde se informará aos viaxeiros e aos propios galegos dos recursos turísticos dispoñibles na nosa Comunidade e a potencialidade de Galicia como destino seguro.

A unidade móbil que funciona a modo de oficina de turismo estará aberta en horario de 11.00 a 14.00 e de 16.00 a 21.00 horas. O espazo informativo está atendido por profesionais da información turística e difunde o destino, poñendo en valor recursos como o Camiño de Santiago, a paisaxe, a natureza, a enogastronomía ou o patrimonio cultural.

A campaña comezou en Santiago de Compostela e está previsto que percorra Galicia e estea presente nas sete cidades galegas e varios dos principais municipios turísticos. Así, tras estar xa en Ferrol, A Coruña, Ribeira, Betanzos, Rianxo, Lugo, Monforte e Sarria chega agora a Viveiro para continuar o seu percorrido por destinos como Ourense, O Carballiño, Poio, Pontevedra, Sanxenxo, O Grove, Cambados, Vilagarcía de Arousa, Cangas do Morrazo, Vigo, Nigrán, Baiona e Tui.

A campaña itinerante dá continuidade á batería de medidas postas en marcha pola Xunta para garantir seguridade e protección aos viaxeiros, traballadores e galegos no actual escenario. Enmárcase no Plan de Reactivación do sector turístico aprobado o pasado mes de abril que inclúe accións para promover Galicia como un destino seguro,  con accións que axuden a xerar liquidez no tecido empresarial e o incentivar o consumo.