Durante os últimos días o porto de Celeiro viviu unhas xornadas de alta intensidade laboral, cun importante volume de descargas de bocarte. Desde o 1 ao 10 de xaneiro desembarcáronse 306,3 toneladas desta especie, cun valor en primeira venda de 245.000 euros segundo datos da plataforma Pesca Galicia. A cifra multiplica practicamente por nove os rexistros do mesmo período do ano pasado, cando se desembarcaron 34,3 toneladas cun valor de 61 .300 euros.
Buques galegos, asturianos, cántabros e vascos venderon as súas descargas na rula de Celeiro dada a alta presenza desta especie na zona. Con todo, desde a Confraría de Celeiro indican que desde onte a situación normalizouse, xa que os cardúmenes de bocarte desprazáronse máis aló de Ribadeo e os pesqueiros que estes días enchían os peiraos fóronse perseguindo as capturas. A campaña foi recibida na zona con “optimismo” entre o sector pesqueiro.
