O BNG de Viveiro comunicou que está a preguntar polo estado actual do cambio de ubicación de Aspanane e a Escola Oficial de Idiomas.
“A día de hoxe, o goberno municipal do PSOE non nos ten informados do estado actual dos trámites previos e necesarios para levar a cabo o cambio de ubicación da Escola Oficial de Idiomas que permitirá ampliar as instalacións do centro de día de Aspanane”, din os nacionalistas viveirenses.
Por isto rogan ao Concello que expliquen e den a coñecer se foi cedida a titularidade do inmoble “Colexio Vello” de Celeiro ao Concello e á Consellería de Educación, así como, coñecer o estado actual do convenio en canto ás partes que o asinarán, prazos e condicións.
“Pedimos que o equipo de goberno conceda a máxima prioridade a estas xestións, tendo en conta a demora que leva xa este proxecto”, rematan dicindo dende o BNG.
