Adxudican as obras do valado do campo de fútbol de herba artificial

Adxudican as obras do valado do campo de fútbol de herba artificialO concelleiro de Deportes, Ramiro Fernández Rey, anunciou que foron adxudicadas as obras da primeira fase de renovación do valado do campo de fútbol de herba artificial. Terán un custe de 38.000 euros e serán realizadas pola empresa local Construcións Cazás. O edil fixo un balance moi positivo da aposta realizada polo Concello nas instalacións deportivas ao longo dos últimos catro anos, nos que o investimento ascendeu a medio millón de euros. Fernández Rey agradeceu a colaboración da Deputación de Lugo e subliñou que a Xunta non puxo nin un euro.

O responsable de Deportes no Concello de Burela dixo que “se adxudicou, no día de onte, a primeira fase da renovación do valado no campo de herba artificial de Burela. Estaba en moi mal estado e necesitaba unha reposición. Adxudicamos ese contrato a unha empresa do pobo, que é Construcións Cazás, por un importe de 38.417´50 euros. É unha inversión importante, pero non vai quedar aquí. Nunha segunda fase, que esperamos adxudicar nos seguintes días, imos renovar a outra parte do valado, que conta cunha inversión de máis de 50.000 euros e que ten a colaboración da Deputación Provincial de Lugo, á que queremos agradecerlle ese esforzo económico que está facendo co Concello de Burela e particularmente coas instalacións deportivas da Marosa, posto que xa ten feito moita inversión aquí neste ámbito. E o Concello non ten máis que agradecer todo ese esforzo inversor que está facendo a Deputación Provincial nas instalacións da Marosa”.

Ramiro Fernández tamén anunciou que “nos próximos días abrirase xa a licitación da construción ou a renovación da grada do campo de fútbol da Marosa, unha grada que polas inclemencias meteorolóxicas necesitaba unha renovación. Quero pensar que na próxima semana xa sacamos a adxudicación desa obra, que conta cunha inversión de máis de 240.000 euros. Estamos falando dunha inversión importantísima e que vai facer o Concello. Era un investimento que necesitábamos e quero destacar o importante montante económico que supón esa inversión para o Concello”.

O edil burelés subliñou que “todas estas inversións das que estamos falando, máis as que se teñen feito nestes últimos catro anos, como poden ser os vestiarios do campo de fútbol, a renovación da iluminación do campo de herba artificial, a renovación da iluminación da pista de tenis, a renovación do peche da pista de tenis e a renovación da iluminación da pista de pádel así como o solo, significan unha aposta moi importante por parte deste equipo de goberno polas instalacións deportivas e particularmente na Marosa. Penso que é de destacar esta inversión histórica nestes últimos catros anos. Nunca houbo ningunha administración que metera tal cantidade de cartos nestas instalacións deportivas e creo que é de agradecer, eu como concelleiro de Deportes, ao alcalde a aposta tan decidida que ten polo deporte, e penso que os clubs deben estar agradecidos, neste caso a Sociedade Deportiva Burela, de que o Concello aposte tan potentemente por estas instalacións”.

O concelleiro de Deportes lembrou que “estes últimos días, a raíz destes temporais,  levantouse o teito dunha das gradas do campo de fútbol que sufriu danos importantes. Estamos xa traballando na realización dun proxecto para arranxar estas deficiencias. Falamos tamén dunha inversión que vai superar os 15.000 euros e penso que hai que destacar a axilidade, neste caso da oficina técnica, en realizar o proxecto e esperemos que nas próximas semanas poidamos sacalo para adiante”.

Fernández Rey engadiu que “en toda esta inversión da que estamos falando hai máis de medio millón de euros nos últimos catro anos, co cal xa nos facemos unha idea da importancia que teñen as instalacións deportivas para este equipo de goberno. Medio millón de euros nos que o Concello apostou firmemente, repito que a Deputación Provincial tamén botou unha man moi importante e desgraciadamente a Xunta de Galicia non puxo un so euro en toda esta inversión. Tivemos contactos coa Xunta e co Xefe Provincial de Deportes, particularmente nos casos da grada e do cerre perimetral, entendo que non é unha decisión persoal, pero tampouco tivemos unha resposta afirmativa para apoiar estes dous proxectos. A Xunta de Galicia, nestes últimos catro anos, non puxo un so euro nestas instalacións deportivas. Penso que hai que destacar o apoio do Concello de Burela para todas estas instalacións e tamén da Deputación Provincial de Lugo”.

E insistiu en que “seguiremos apostando polas instalacións deportivas e polo deporte de Burela. O movemento demostrase andando e aí están os cartos e as inversións. Xa digo que, nas próximas semanas, imos anunciar a licitación da segunda fase do peche do campo de herba artificial e a renovación da grada do campo de fútbol, que están nos trámites administrativos”.

Etiquetas

A %d blogueros les gusta esto: